Министерот Бектеши: Се повеќе растат инвестициите на САД во Северна Македонија

06.02.2020 12:26:26

Министерот за економија Крешник Бектеши заедно со Претседателот на Владата на Република Северна Македонија Оливер Спасовски, министерката за странски инвестиции, Зорица Апостолска, директорот на Дирекцијата за трговски и индустриски развојни зони, Александар Младеновски, директорот на компанијата „ДУРА Аутомотив“, Мајк Бекет и амбасадорката на САД во нашата земја, Кејт Мари Брнс ги посети производствените капацитети на американската компанија „ДУРА Аутомотив Системс“, која веќе го започна производството во својата прва фабрика и ги стартува работите на изградбата на две нови фабрики. 

Министерот за економија Крешник Бектеши, нагласи дека поддршката на домашниот бизнис и на странските инвеститори покажува видливи резултати преку сè поголемиот број на странски инвестиции во нашата земја, но и преку зголемувањето на бројот на вработени во индустријата.

„Една од стратешките цели на оваа Влада е развој на економијата, зголемување на продуктивноста, вработувањето и подигнување на животниот стандард на граѓаните. Токму оваа инвестиција на „ДУРА Аутомотив“ е уште еден пример за успешноста на нашите економски политики, бидејќи ова е уште една компанија која ги почуствува бенефитите на Планот за економски раст“, истакна министерот Бектеши.

Министерот Бектеши истакна дека американските инвестиции во Северна Македонија постојано се зголемуваат, факт што зборува за големиот број граѓани кои ќе можат да работат со добри услови за работа и со цврсти плати, со што ќе се спречат младите да ја напуштат земјата.

За време на посетата на „ДУРА Аутомотив Системс“, премиерот Спасовски истакна дека станува збор е една од најмоќните компании во автомобилската индустрија со над 30 фабрики и инженерски центри во 12 земји во светот и со задоволство констатира дека токму Северна Македонија е тринаесеттата земја во која компанијата гради дури три фабрики.

„Трите фабрики на „ДУРА Аутомотив Системс“ ќе вработуваат околу 1.000 наши сограѓани. Сите тие ќе работат во најсовремени фабрички системи и ќе се стекнат со обуки и вештини да учествуваат во високо-технолошки процеси. За истакнување е и намерата на компанијата, за поддршка на нејзините фабрики да изгради и Центар за истражување и развој, кој ќе вработи висококвалификувани и искусни инженери, вклучувајќи инженери за компјутерски дизајн, експерти за машини, механички и електроинженери и во кој ќе се врши обука за вработените“, посочи премиерот Спасовски при посетата во придружба на министерот за економија Крешник Бектеши,

Премиерот Спасовски подвлече дека оваа Влада за две и пол години договори 24 нови странски инвестиции во нашата земја, а тоа е речиси двојно повеќе во споредба со истите периоди од 2013 до 2015 година, и од  2015 до јуни 2017 година.

Воедно премиерот Спасовски информираше дека преку владините економските политики отворени се близу 60 илјади работни места за само девет квартали во изминатите две и пол години, а невработеноста во третиот квартал на 2019 година е намалена на рекордно ниски 17,1 проценти.

Директорот на Дирекцијата за трговски и индустриски развојни зони, Александар Младеновски, наведе дека за важноста на сега веќе трите инвестиции на „ДУРА Аутомотив“ во Република Северна Македонија зборува и фактот што лично првите луѓе на компанијата се заземаа преговорите да се одвиваат со забрзана динамика.

„Менаџментот на ДУРА  ја препозна поддршката на Владата и сериозните презентации на условите и погодностите што ги обезбедуваме во зоните за сите странски инвеститори согласно Законот за ТИРЗ и Законот за финансиска поддршка на инвестиции“, посочи директорот Младеновски.

Во своето обраќање директорот на компанијата „ДУРА Аутомотив“, Мајк Бекет, истакна дека производствените капацитети во нашата земја ќе интегрираат врвна и иновативна технологија.

„Раководниот тим на ДУРА високо ја цени извонредната соработка што ја добивме од Владата на Република Северна Македонија. Нивната силната поддршка му овозможи на нашиот тим за европски операции исклучително брзо да премине кон финализирање на ова стратешко дополнување во нашето работење“, истакна директорот Бекет.