Скопје 17.09.2025
Министерот за економија и труд Бесар Дурмиши на „Бизнис Лидер“: Владата и стопанството се партнери во градење на модерна и одржлива економија
Министерот за економија и труд, Бесар Дурмиши, денеска се обрати како почесен гостин на најголемата бизнис конференција во земјава – „Бизнис Лидер“, која ги обединува најуспешните претприемачи, визионери и компании што ја движат македонската економија напред.
Во своето обраќање, министерот истакна дека оваа конференција претставува симбол на волјата, капацитетот и одговорноста за зајакнување на темелите на економијата и за создавање подобра иднина за граѓаните.
„Нашата визија е јасна – Македонија да стане зелена, дигитална и иновативна економија, со силно претприемништво и со култура на иновации во секоја компанија. Само преку партнерство помеѓу јавниот и приватниот сектор можеме да обезбедиме стабилен раст, нови работни места и подобар животен стандард за сите граѓани“, рече Дурмиши.
Тој нагласи дека Владата веќе спроведува реформи за унапредување на деловното опкружување, за привлекување инвестиции и за создавање услови младите да ја градат својата иднина дома. Министерството за економија и труд, со проширената мисија по реорганизацијата во 2024 година, работи на создавање нови, добро платени работни места, поддршка за микро, мали и средни претпријатија, стимулирање на инвестиции и развој на пазарот на трудот преку обуки, практикантства и самовработување.
„Поддршката за стартап компании, вложувањето во истражување и развој и дигитализацијата на јавните услуги се конкретни чекори за создавање модерно и конкурентно деловно опкружување. Истовремено, зелената трансформација – од енергетска транзиција кон обновливи извори до воведување еколошки практики – е наш приоритет, затоа што претставува и обврска кон идните генерации и нова можност за раст и конкурентност“, потенцираше министерот.
Тој се осврна и на новите законски решенија и стратегии, како што се Законот за финансиска поддршка на инвестиции, новите закони за технолошко-индустриски и зелени индустриски зони, како и Стратегијата за мали и средни претпријатија 2025–2030 и Акцискиот план 2025–2027. Преку нив, државата вложува 4,23 милијарди денари финансиска поддршка, од кои 1,77 милијарди се обезбедени од државниот буџет.
Посебен акцент стави и на Оперативниот план за вработување за 2025 година, со буџет од 2,5 милијарди денари, кој ќе опфати над 16.000 граѓани. „Овие политики го стимулираат претприемништвото и создаваат конкурентна работна сила која ќе одговори на барањата на современата економија“, нагласи Дурмиши.
Министерот најави и нови мерки во трудовото законодавство – нов закон за работни односи кој ќе стапи на сила на 1 јануари 2026 година, со цел намалување на неформалниот труд и зголемување на вработливоста, особено кај сезонските работници.
„Економијата мора да биде човечка и инклузивна. Секое ново работно место, секој стартап и секоја инвестиција во знаење и технологија е инвестиција во иднината на нашата земја. Со секоја нова мерка за поддршка на фирмите и со секој циклус за обука на младите, ја потврдуваме визијата дека Македонија е место каде што секој потенцијал може да се реализира“, истакна министерот.
На крајот од своето обраќање, Дурмиши порача дека економските политики и стратегии што Владата ги спроведува се резултат на тимска работа и партнерство со стопанските комори, универзитетите, меѓународните партнери и граѓаните. „Секој успех на еден бизнис лидер е успех на целата држава. Заедно градиме економија на иднината – модерна, одржлива и инклузивна, за доброто на сегашните и идните генерации“, заклучи министерот за економија и труд.
