Министерството за економија и труд информира дека во рамки на Стратешкиот дијалог меѓу Република Северна Македонија и Соединетите Американски Држави, во Вашингтон се одржа состанок посветен на економија, трговија, енергетика дигитализации и инвестиции во земјава.
На сесијата учествуваше министерот за економија и труд, Бесар Дурмиши, заедно со министерот за надворешни работи и надворешна трговија, Тимчо Муцунски, министерката за енергетика, рударство и минерални ресурси, Сања Божиновска, министерот за дигитална трансформација, Стефан Андоновски, министерот за внатрешни работи Панче Тошковски, Министерот за одбрана Владо Мисајловски, како и претставникот од кабинетот на премиерот Орхан Муртезани, директорот на НОМАГАС, Недим Рама, како и амбасадорот Зоран Попов.
Од американска страна учествуваа Даниел Џ. Лоутон, заменик помошник државен секретар за Западна и Централна Европа и Јужна Европа, Жан Хеулант од Министерството за енергетика на САД, Ребека Неф од Економското биро, како и Сара Велс, нотеткер на сесијата.
Во рамки на работниот ручек беа разгледани можностите за продлабочување на економската соработка, унапредување на трговските односи и зајакнување на енергетската сигурност. Посебен акцент беше ставен на привлекување инвестиции, диверзификација на енергетските извори и справување со актуелните глобални економски и енергетски предизвици.
Состанокот претставува значаен дел од Стратешкиот дијалог меѓу двете земји и потврда на заедничката заложба за унапредување на билатералните економски односи и одржлив економски развој.
Министерството за економија и труд останува посветено на креирање политики кои ќе придонесат за економски раст, стабилност и подобрување на животниот стандард на граѓаните.
